قومی اسمبلی اجلاس میں ایم کیو ایم کے علی رضا عابدی نے جنوبی سندھ صوبہ بنانے کی قرارداد ایوان میں پیش کرنے کی اجازت مانگ لی جس پر چیئر آف دی پینل ایس اے اقبال قادری نے قرارداد سیکریٹریٹ میں جمع کرانے کی ہدایت کردی۔ علی رضا عابدی کا انموقع پر قرارداد کے حوالے سے کہنا تھاکہ آپ ایوان کی رائے لے لیں، شیخ آفتاب بھی ایوان میں موجود ہیں، اس دوران ایم کیو ایم کے ارکان نے شور شروع کیا تو چیئر آف دی پینل نے اجلاس ملتوی کردیا۔
قومی اسمبلی کی آئینی مدت مکمل ہونے سے ایک روز قبل منعقدہ اجلاس کے دوران ارکان کی جانب سے عدم دلچسپی دیکھنے میں آئی اور ایک وقت 342 کے ایوان میں صرف16 ارکان موجود تھے، ایوان میں ایم کیو ایم ارکان کی اکثریت موجود رہی۔جب اجلاس کی صدارت ایم کیو ایم کے ایس اے اقبال قادری نے سنبھالی تو سلمان بلوچ نے ازراہ مزاق کہا کہ چیئرمین صاحب ابھی ایوان میں ایم کیو ایم کی اکثریت ہے ،جو منظور کرانا ہے کرالیں، پاکستان میں انتظامی بنیاد پر بیس صوبے بننے چاہیئں، سلمان بلوچ نے کہا کہ سندھ میں جنوبی صوبہ بننا چاہیے۔جس کے بعد علی رضا عابدی نے قرارداد پیش کرنے کی کوشش کی۔
