حکومت پنجاب نے ہفتے میں پانچ دن اساتذہ کی ٹریننگ کے لیے اسکولوں کو کھولنے کی اجازت دینے کا فیصلہ کیا ہے۔
نجی اسکول مالکان نے لاہور میں صوبائی وزیر تعلیم مراد راس سے ملاقات کی جس میں کورونا کی صورتحال کا جائزہ لیا گیا۔
اس موقع پر وزیر پنجاب مراد راس کا کہنا تھا کہ ستمبر کے پہلے ہفتے میں ہونے والے انٹر پروونشنل اجلاس میں اسکول کھولنے کے حوالے سے حتمی فیصلہ کیا جائے گا۔
انہوں نے کہا کہ نجی اسکول مالکان بھی اپنے اساتذہ اور دیگر اسٹاف کو کورونا سے بچاؤ کی تربیت دیں گے۔
ان کا کہنا تھا کہ تمام نجی و سرکاری اسکولوں کی صفائی ستھرائی اور سینی ٹائزیشن کا خیال رکھنا لازم ہوگا۔
انہوں نے کہا کہ تمام نجی اسکول مالکان سے درخواست ہے کہ ان مشکل حالات میں فیس میں اضافہ نہ کیا جائے۔
